Í eini tíð við bæði fólkatingsvali og løgtingsvali hevur talgilda upplýsingarumhvørvið størri týdning enn nakrantíð. Vitlíki (AI) og algoritmur ávirka, hvat vit síggja, hvat vit lesa, og hvussu politisk boð verða raðfest, tulkað og spjadd.

Á hesum skeiðinum kanna vit, hvussu generativt vitlíki og algoritmiskar skipanir mynda demokratiska kjakið. Vit seta sjóneykuna á, hvussu syntetiskt innihald verður framleitt, hvussu innihald verður raðfest á talgildum pallum, og hvussu dátugrundarlag, vekt og designval kunnu hava avgerandi árin á niðurstøður og tulkingar.

Skeiðið sameinir teoretiska fatan og praktiska venjing. Luttakarar arbeiða við einum konkretum dømi og læra, hvussu ein algoritmisk samanbering verður bygd og tulkað – og hvussu smáar broytingar í kriterium og dátugrundarlagi kunnu broyta heildarmyndina.

Endamálið er ikki at ávirka politisk sjónarmið, men at styrkja kritiska fatan og geva djúpari innlit í, hvussu vitlíki kann ávirka eitt demokratiskt samfelag – serliga í eini valstríðstíð.

Skeiðið er politiskt neutralt og ætlað øllum, ið hava áhuga í samspælinum millum tøkni, miðlar og fólkaræði.